إيه .. حلم ؟

كالعادة .. منضدة صغيرة .. وعليها ماج القهوة .. أكثر هدية تعلقت بها –الماج- بصورة ولد وبنت يتعانقان .. والقلوب تتناثر من حولهم وكأن قلب واحد لا يكفيهم .. وكلمة I LOVE U تحتهم ..
وكأنهم يقولون لي بلا مبالاة : فلتحترق بحقدك !!

أخذ رشفه منه .. ثم أمد يدي إلي تلك العلبة .. علبة السجائر التي تغيرت عليها جمل التحذيرات حتي اني بدأت جدياً في التخيل بأنه لربما اجدها غداً وقد كتب عليها : فكك مني بقي ياحمار .. انت معندكش دم !
أفتحها بلا مبالاة .. أخذ منها ضحية –سيجارة- اخري .. أشعلها (بصدق) !
وأنظر الي المطفأة امامي ..
فأجد سيجارة وبعض الرماد .. بالضبط كالإنسان في قبره .. عظام .. وبعض الرماد ..
فأواسيها قائلاً : البقاء لله !

شذي تغني بجانبي : برجع بعمري ..
فأشرد معها قليلاً .. أو كثيراً .. لا يهم ..

ذكريات

12/2007
بداية صدمة اخري .. أجلس أمامها .. منكسراً ذليلاً ..
-بتوحشني .. بحبني وانا معاك.. انت اكتر حد بكون مبسوطة وانا معاك .. بس من غير بحبك .
بالتأكيد كان أبسط واجباتي كإنسان ان ادمع .. ولكن ..

29/5/2008
أجلس مع بعض اصدقائي في صالون الحلاقة .. فاليوم هو يوم زفافي .. هاتفي يرن ..
- وحشتني
= (بصدق) والله مش اكتر مني !
- انت فين ؟
- مع جماعة اصحابي قاعدين شوية واحتمال بالليل نخرج
انهي المكالمة .. ينظر احدهم الي قائلاً : مستعجلة اوي ؟
فأبتسم .. وأصمت ..

12/2008
اانا وأمي :
- انا قلتهالك اكتر من مرة وهقولهالك تاني .. انت معندكش غالي ..
- ................

3/2009
جلسة صداقة
- انت بقيت ندل بزيادة اوي .. ليه كل ده ؟
- .................
- بص ياحمد .. انت عارف معزتك عندي .. عشان كدة بكلمك .. فكك من اللي انت فيه .. صدقني انت مش اد ان حد يدعي عليك او يقول حسبي الله ونعم الوكيل ..
- .................

3/2009
- ابقي اقرا قران قبل متنام ياحمد
- بقرا يومياً .. بس اشمعني ؟
- يابني انت بقالك فترة بتقومني من النوم مفزوعة علي صوت آهاتك .. اروح اشوفك الاقيك رايح في النوم !

4/2009
- أقولك ياسيدي .. مبتحسش بيا .. عمرك مفكرت تحكيلي ايه اللي تاعبك .. ايه اللي مضايقك .. ايه اللي حصل في يومك .. مع إني بحكيلك علي كل حاجة بالتفصيل .. إحنا بقالنا سنة مخطوبين وكلها شهور وهبقي مراتك .. هتحكيلي امتي ؟
- ................

4/2009
- انت فاهم انت بتطلب مني ايه .. انت بتقولي يا اما نفضل كدة يا اما ابعد عن حياتك خالص
- خلينا اصحاب احسن
- ماشي
-----------------------
عودة الي القلم .. في يوم جديد .. كغيره قديم ..
نفس المشاهد تتكرر ..
منضدة صغيره .. عليها ما أصبحتم تعرفونه ..
وقلمي بيميني .. وسيجارتي في شمالي .. ولا زلت انتظر